Stoılov quramaǵa serpilis ákeldi

Sońǵy tórt jyldyń kóleminde Qazaqstan fýtbolyna jańa lep ala kelgen bolgarııalyq bapker Stanımır Stoılov «Astana» klýbyndaǵy qyzmetinen ketip, ult­tyq quramanyń tizginin ustaǵany belgili. Qurama alǵashqy joldastyq kez­de­sýdi Vengrııa komandasymen ótkizdi. Qazaqstan quramasy 2014 jyly ótken jol­dastyq oıynda 3:0 esebimen oısy­raı jeńilgen edi. Mine, araǵa tórt jyl salyp qaıta kez­des­kende 3:2 esebimen jeńis­ke jetti.

Oıynnyń ózi biz úshin sátti bastaldy. Baýyrjan Islamhan kótergen buryshtamadan Roman Murtazaev esep ashty. Araǵa tórt mınýt salyp Bahtıer Zaınýtdınov esepti eseleı tústi. Bul quramaǵa endi ǵana qosylǵan jas fýtbolshynyń debıýttik oıy­nyndaǵy tuńǵysh goly boldy. Jalpy, aıta ketýimiz kerek Qa­zaqstan quramasynyń qa­taryna alyna salyp, á degennen gol soqqan fýtbolshylar saýsaqpen sanarlyq. Olar Baq­tııar Baıseıitov, Núrken Mázbaev, Vladımır Nıdergaýs, Vıktor Zý­barev sekildi sanaýlylar ǵana. Al olardyń qataryna bul oıynda tek Zaınýtdınov qana emes, Erkebulan Seıdahmet te enip otyr.

Kezdesýdiń 21-mınýtynda alǵyr shabýylshy Adam Salaı gol salǵan soń, Seıdahmet te bir serpilip, qaqpaǵa dopty dál ba­ǵyt­­taǵan bolatyn. Oıyn­nyń jar­ty saǵaty óte bergen tusta esep 1:3 bo­lyp, bizdiń paıda­myzǵa jazylyp turdy. Jaqyn­da ǵana reseılik klýbtyń qatary­na aýysqan Seı­dahmet týraly «Egemen Qazaq­stan» gazeti alǵash­qy­lardyń biri bolyp reportaj berdi. Gazet tilshisi ar­naıy Bash­qurt­standaǵy «Ýfa» klý­bynyń oıy­nyn tamashalap, Erke­bu­lanmen suhbattasyp qaıtqan edi. Jurt jaqtaǵan jas jigit quramaǵa alyna salyp, birden óziniń erek oıynshy ekenin kórsete bildi. Endigi bar úmit osylaı ósip kele jatqan jastarda ekenin jalpaq jankúıer keshegi oıynnan anyq sezdi-aý dep otyrmyz.

Odan bólek Stanımır Stoılov Mogomed Paragýlgov, Iýrıı Persýh sekildi jastardy da alańǵa shyǵaryp, bir tekserip aldy. Bul degenimiz, burynǵy jeńilisterdi umytqan, jeńimpazdyq rýhy bar jańa qurama komanda jasaqtalyp jatyr degendi aıǵaqtaıdy. Bolgarııalyq bapker endi búgin taǵy bir synnan ótpek. Vengrııa jerinde ótetin kelesi oıynda otandastarymyz Stanımırdiń jerlesterine qarsy turady. Bolgarııa quramasy biz Vengrııany utqan kúni Bosnııamen oınap jeńilip qaldy. Demek aldaǵy oıyn qazaq fýtbolshylarynyń qarymyn kórsetedi.

Ermuhamed MÁÝLEN,

«Egemen Qazaqstan»